En 1856 al par de Feldhofer, nel valle alemán del ríu Neander, apaecieron unos güesos que nel so momentu xulgáronse raros. Yeren una calota cerebral, un fémur y dellos otros nicios óseos gruesos y escolforiaos, polo que fueron atribuyíos a un osu, a una tribu salvaxe, a dalgún babayu y a un cosacu que morrió mientres buscaba a Napoleón pa matalu. Y estes son sólo dalgunes de les munches teoríes desenvueltes entós pa esplicar tan singular afayu. Foi en 1864 cuando’l xeólogu irlandés William King, clasificó los restos como pertenecientes a una especie humana, la primera identificada amás de la nuesa, sumida abenayá y carauterizada por “escuridá moral”, daqué que se dedució del tamañu los güesos. Esta imaxe del Home de Neanderthal como un brutu ensin celebru, de caminar duldosu y aspeutu gorilescu caltiense entá güei na imaxinería popular. La verdá ye bien distinta. Los nuevos afayos arqueolóxicos tresmítennos la imaxe d’un ser capaz, axilosu, con recursos téunicos y una desenvuelta sociabilidá. Gracies al llamáu “Proxectu Xenoma Neanderthal”, desenvueltu nel Institutu Max Planck d’Antropoloxía evolutiva de la ciudá de Leipzig, sabemos que comíen muncha carne y pocu pexe, que teníen los güeyos nidios, yeren roxos y teníen un llinguaxe desenvueltu. Llueñe d’aquellos brutos ensin celebru, fueron la especie más próxima a nós que nunca esistiera. Ún de los xacimientos que contribuyó a conocer la realidá d’estos magníficos seres, ye’l xacimientu de la cueva d’El Sidrón, en Borines, nel asturianu conceyu de Piloña. El cómo y el porqué de la importancia d’esti xacimientu va dir nel capítulu siguiente.

Lo cierto ye que visitar la cueva tolos meses de setiembre convirtióse nun ritual que cierra’l tiempu de branu. Y entrar n’El Sidrón, ye tamién visitar la galería de los antropomorfos. Fechaos ente’l final del Neolíticu y la primer edá de los metales, son unes representaciones vulvares asitiaes nuna estrecha galería a la qu’hai qu’aportar mediu a gates mediu arrastraos, pa depués salir d’ella pol mesmu procedimientu, lo que supon la esperiencia más próxima a transitar per una canal del partu que pueda sentise una vegada que yá nacimos. Nuna ocasión, un conocíu estudiosu de la música popular asturiana y yo mesma, consiguimos llegar hasta esti divertículu non ensin esfuerzu. Sentámonos pa tomar un pocu del escasu osíxenu del aire, mientres la guía esplicábanos, con cientifismu melindrosu, les formes del sexu femenín pintaes y grabaes na roca. Mientres trazaba una llínea cola lluz y entrugábanos si yéramos a velo bien, el mio amigu esclamó: “la rata”. Y asina quedó. La galería de les vulves de la cueva d’El Sidrón acababa ser bautizada pa la hestoria de l’arqueoloxía asturiana como la “Galería de los ratumorfos”. Una contribución del asturianu nel apasionante mundu qu’arrodia les escavaciones arqueóloxiques del home de Neanderthal.