Noticies

Aconceyamientu col asesor de llingua asturiana de la Conseyería d’Educación

El llunes 15 d’abril, miembros d’Ástura aconceyaben col asesor de llingua asturiana de la Conseyería d’Educación y Universidaes, José Luis Remis. Esta reunión sirvió pa presentanos formalmente como asociación, pa facer siguimientu de la pitición del usu de la toponimia oficial asturiana na Conseyería y informanos sobre la situación na que s’alcuentra l’asignatura de llingua asturiana.

En cuantes al usu de la toponimia se nos aseguró que, n’acabando la Selmana de Lletres Asturianes, la Conseyería diba ponese a trabayar nello y qu’esperaben entamar el cursu escolar viniente con ello iguao. Comunicósenos que se ta trabayando pa la creación de la especialidá de Llingua Asturiana y que se ta atropando información pa qu’a partir del últimu trimestre del añu entame’l procesu d’estudiu. Informósenos que la conseyera comprometióse a dar solución a esta situación d’interinidá enantes de qu’acabe la llexislatura. Tamién se nos confirmó que, depués de les negociaciones que tuvo la Conseyería asturiana d’Educación en Madrid, la futura situación de l’asignatura, dientro del marcu de la futura llei LOMCE, va depender directamente del gobiernu asturianu. Nun tienen previsiones de crear centros pilotu col asturianu como llingua vehicular, pero sí estudiaríen cualquier propuesta que-yos llegara de les escueles asturianes, nesti sentíu.

Homenaxe a Pachín de Melás nel so 75 cabudañu.

Les organizaciones Ástura ya Iniciativa Pol Asturianu entamen un actu d'alcordanza a la memoria d'Emilio Robles Muñiz, conocíu pol nomatu de Pachín de Melás. Ún de los autores en llingua asturiana más populares del sieglu XX. Esti mes pasáu cumpliéronse 75 años de la so muerte na cárcele d'El Coto en Xixón.
Dende ambes organizaciones, creemos que ye un personaxe que nun puede ser escaecíu pola so importante aportación a a la lliteratura y a la llingua y cultura asturianes, y por ello convidamos a tolos ciudadanos que quieran participar a facelo asistiendo al actu y lleendo un poema o otru testu de Pachín que-yos preste.

Ta confirmada yá l'asistencia de dalgunos escritores y otres persones de la sociedá asturiana, que van facer homenaxe al escritor xixonés.

L'actu celebraráse'l vienres 5 d'abril, a les 20:00 hores nel Atenéu Obreru de Xixón (cai Cuadonga, 7 1u Izq.)

Llegalización d'Ástura

Dende´l pasáu 15 de xineru de 2013 l'asociación cultural “Ástura” ta llegalizada nel Rexistru del Principáu d'Asturies, col númberu 10.450, sección primera. Anque yá nun ye noticia que tea inscrita n'asturianu, nun hubo nengún problema pa realizar tala inscripción cola documentación solo n'asturianu. Ansina mesmu, nos trámites n'Axencia Tributaria y p'abrir una cuenta bancaria en Liberbank, presentose tamién la documentación solo n'asturianu. Dende esti momentu l'asociación “Ástura” -el nome más antiguu que se conoz d'Asturies- desbroza'l camín pa trabayar nel so ámbitu d'actuación, que nun ye otru que'l de la llingua, cultura y identidá asturiana.

Ilesies d’Asturies, nueva estaya de trabayu n’Ástura

Ástura, como asociación implicada na dignificación y promoción de la llingua asturiana en toes les estayes de la sociedá, entama Ilesies d’Asturies. Esta nueva estaya de trabayu trabayará por caltener los avances consiguíos nel usu del idioma y que l’asturianu tenga una presencia cada vegada mayor nes Ilesies d’Asturies.
Tamién, revisará la presencia actual de la llingua asturiana nel conxuntu de les creencies n’Asturies, especialmente, na Ilesia Católica a traviés d’un informe.
Ástura tratará d’animar a la xente relixoso al usu normal del idioma dientro de les distintes celebraciones que se cellebren en cada creencia.

Presentación d'escritu na Conseyería d'Educación

El día 31 de xineru pasáu Ástura presentó en rexistru de Llamaquique d’Uvieu un escritu solicitando l’aplicación, na Conseyería d’Educación, de los decretos de toponimia publicaos hasta la fecha. Ye constatable qu’esta y otres conseyeríes nun empleen los nomes oficializaos y utilicen sistemáticamente los anteriores yá derogaos. Nel documentu manifestamos que ye inaceptable l'incumplimientu de la llegalidá vixente por parte de la Alministración que l'afitó, y solicitamos qu’escomiecen, de forma inmediata, a usar la toponimia na so forma correcta.

Toponimia na nueva carretera AS-119

Inaguróse la carretera AS-119 ente L’Entregu y Lieres y comprobemos que’l Principáu utiliza la denominación oficial de los topónimos a los qu’afecta. Con dalgún error, eso sí, que manifestaremos a la Conseyería pa qu’igüe y nun los perpetúe.

Per otru llau, siguiendo cola señalización vertical, sí constatemos que’l Ministeriu español d’infraestructures, propietariu de l’autopista que señaliza la salida a esta carretera, sigue ensin usar la toponimia asturiana oficializada entrando en choque cola realidá llegal asturiana.

Ástura pon en marcha la estaya toponímica

Conscientes de la importancia que tien la toponimia asturiana pa la nuestra llingua, l'asociación Ástura entama los sos trabayos de normalización toponímica baxo les directrices de Llinu Álvare, responsable d'esta estaya dientro l'asociación.