La mina d’Arnáu protagoniza la charra mensual

‘El mar que se volvió negro. La mina de Arnao: arqueología del paisaje minero-industrial en Asturias’ ye’l títulu de la charra d’Ástura d’esti martes. Va correr a cargu d’Iván Muñiz López.
 
El profesor de la UNED, investigador del grupo Arqueos de la Universidá d’Uviéu y direutor cultural nel Muséu de la Mina d’Arnáu, va amosar a les persones qu’acudan esta tarde al Atenéu Obreru de Xixón les carauterístiques d’ún de los llugares más emblemáticos del patrimoniu industrial del país, que destaca por ser primera esplotación de carbón mineral de la Península Ibérica nel sieglu XVI, la cuna del primer ferrocarril del Estáu y la única mina submarina del continente, ente otros datos destacaos. La so historia representa “una ocasión única pa comprender los procesos de tresformación del paisaxe minero-industrial nos sos oríxenes, los cambios producíos na vida de los sos pobladores y na so mentalidá, y les cicatrices que dexó nel espaciu. Nesti casu, y d’una manera abreviada y didáutica, conocerémos estos acontecimientos claves auniendo los datos escritos y la perspeutiva arqueolóxica. Será un viaxe nel tiempu nel que nos somorguiarémos, a vegaes d’una manera lliteral, nesi paisaxe asturianu que se tornó prietu”, apunten dente Ástura.
 
L’aniciu de la charra de Muñiz López, Premiu Estraordinariu Fin de Carrera y Doctor Cum Laude n’Historia, ta prevista pa les 20 hores, con entrada llibre al llocal astitáu na cai Cuadonga númberu 7. Esta actividá ta entamada por Ástura en collaboración col Atenéu Obreru de Xixón.