Día de les Lletres Asturianes

Ástura ye una asociación nueva nel tiempu que naz pa trabayar pola llingua, la cultura asturiana y el país a la so manera, ensin interferir con otres asociaciones, sinón más bien en collaboración y bona sintonía. Los sos fines tan bien ñidios: afalar a la sociedá civil asturiana –y a tolos falantes del dominiu llingüísticu astur– al usu cotidianu y natural de la nuestra llingua en tou tipu de rellaciones, circunstancies y ámbitos d’actuación, privaos, profesionales, etc. Tamién, afitar un llugar central, una casa común, onde converxan informaciones, iniciatives, esmoliciones, etc., dende onde puedan promovese y apareyase campañes y aiciones empobinaes a la promoción y espardimientu de la llingua asturiana por entemedies d’afayadices estayes de trabayu, y, por último, acoyer y sopelexar trabayos d’investigación, propuestes d’actuación, denuncies, alderiques, etc., tolo que sía cultura viva asturiana, incluyendo, dende llueu, materies consideraes como científiques o téuniques.

Güei, que tamos a les puertes de cellebrar el XXXIV Día de les Lletres Asturianes, Ástura saluda a los miembros de l'Academia de la Llingua y asoleya la so norabona a esa Institución pol importante llabor normativizador de la nuestra llingua y, coles mesmes, confírma-yos la presencia de la nuestra asociación el vienres 3 de mayu nel teatru Campoamor d'Uviéu. Col mesmu enfotu, Ástura saluda a los miembros de la Xunta pola Defensa de la Llingua Asturiana y felicita a esta asociación pol so llabor reivindicativu pa cola nuestra llingua y afalámoslos a siguir trabayando pola oficialidá al tiempu que-yos confirmamos la nuestra asistencia el día 3 de mayu a la Manifestación que la Xunta tien entamada n'Uviéu. 

Pola llingua, pola cultura, pol país.