Conferencia "La Ponte-Ecomuséu: xuniendo orielles, desbordando lo convencional"
Esti martes, 19 de xineru, a les 20H.00’, nel llocal social del Atenéu Obreru de Xixón (Cai Covadonga, 7 - 1oIzda.), Ástura organiza una conferencia sobre La Ponte-Ecomuséu: xuniendo orielles, desbordando lo convencional, a cargu de Pablo López Gomez.
Nel conceyu de Santo Adriano, a mediu camín ente Uviéu y Quirós, desenvuélvese un procesu singular, dinámicu, nel que la comunidá trabaya nel caltenimientu, l’estudiu, la interpretación y l’espardimientu del so patrimoniu d’un mou organizáu y ye a algamar resultaos de munchu interés pa tola sociedá asturiana: creación d’emplegu, ameyoramientu de los servicios prestaos, fomentu de la investigación (histórica y arqueolóxica nesti casu), formación y, tornando al entamu, caltenimientu de tol patrimoniu. Unos recursos pasivos dende cuantayá camúdense d’esti mou nun elementu xenerador d’actividá social, cultural y económica. ¿De qué tamos falando? De La Ponte. L’Ecomuséu. ¿Qué ye La Ponte? La Ponte ye un ecomuséu xestionáu pola población llocal onde se socializa’l patrimoniu cultural y se tresmiten valores de respetu hacia les comunidaes rurales y la so cultura. Ye, amás, un espaciu d’alcuentru, deprendimientu y dinamización onde se investiga, onde se faen talleres y otru tipu d’actividaes, y onde s’atalanta y reflexona sobre los problemes del propiu entornu. L’ecomuséu funciona como una rede abierta a la collaboración con otres organizaciones. D’esta miente respuenden los socios y socies del Ecomuséu a la pregunta “qué ye La Ponte pa tí”, y ye que, tres más de 5 años de xestación d’esti proyeutu, siguimos ameyorando y definiéndonos, trabayando dende la xestión cultural a la innovación social ensin perder de vista la investigación y cola idea de ser un Ecomuséu pa la comunidá.
Pablo López Gómez ye Llicenciáu n’Historia pola Universidá d’Uviéu, tien el Máster n’Arqueoloxía y Territoriu pola Universidá de Granada y tien en cursu una memoria de Llicenciatura na Universidá de Lleón sobre “Les brañes y los aprovechamientos ganaderos d’alta montaña nos conceyos de Cangas del Narcea y L.laciana na dómina de la Edá Media. Una aportación dende l’arqueoloxía”. Ye miembru del grupu d’investigación Arqueoloxía Agraria dirixíu pola Dra. Margarita Fernández Mier (Univ. Lleón). La so esperiencia profesional desenvuélvese nos ámbitos de l’arqueoloxía y l’arqueoloxía agraria, que ye la so especialidá, nos que trabayó como téunicu en dellos proyeutos venceyaos al Camín Real de la Mesa, al Chao Samartín, a Os Castros de Taramundi, a les mines de cobre del Aramo o al estudiu de la formación del paisaxe durante la Edá Media nel conceyu de Cangas (proyeutu del Ministeriu de Ciencia e Innovación, que llega a dirixir). Agora trabaya como xestor e intérprete de Patrimoniu en La Ponte-Ecomuséu. Tien espublizaos cinco estudios, dalgunos en collaboración, sobre temes de ganade- ría d’alta montaña, etnoarqueoloxía de los asitiamientos pastoriles y l’estudiu de les árees de pastu na Cordillera nel medievu.
La entrada ye llibre.
